Pangkalahatang-ideya
Ang Fushimi Inari Taisha ang pangunahing dambana na iniaalay kay Inari Okami at matatagpuan sa kanlurang paanan ng Mt. Inari. Ang Honden, o main shrine, ay itinayo noong 1499 at itinalaga bilang isang mahalagang kultural na ari-arian. Ang Gonden, na itinayo noong 1635, ay isang pansamantalang dambana na bahagyang mas maliit kaysa Honden at may istilong Gokensha Nagarezukuri, isang gabled roof style na may anim na haligi. Ang dalawang-palapag na Romon gate, na itinayo noong 1589, ay ipinagawa matapos ang panalangin sa paggaling ni Oomandokoro, ang ina ni Toyotomi Hideyoshi—ang pinunong nagbuklod sa Japan noong ika-16 na siglo.
Napananatili rin ang iba pang mga gusali tulad ng Gehaiden, kung saan inihahanay ang mga mikoshi tuwing Inari Festival; ang Okumiya, na may tatlong silid; at Byakkosha, isang dambana para sa “mga puting fox ,” ang mga sugo ni Inari Okami. Dahil dito, mataas ang kahalagahan ng dambanang ito bilang isang grupo ng mga gusali na sumasalamin sa katanyagan ng pananampalataya kay Inari Okami noong panahon ng early modern Japan.
Pagpapakilala ng mga kultural na ari-arian
Honden
Ang Honden o main shrine ang sagradong gusali kung saan nananahan si Inari Okami, at dito isinasagawa ang iba’t ibang ritwal at panalangin sa buong taon. Matatagpuan ito sa loob ng Naihaiden at itinayo noong 1499 sa istilong nagare-zukuri, kilala sa streamlined nitong bubong. Ang mahigit 500 taong gulang na gusali ay pininturahan ng vermillion at kinikilala bilang isang mahalagang kultural na ari-arian.
Limang diyos ang nakatalaga dito: Ukanomitamano Okami, Satahikono Okami, Omiyanomeno Okami, Tanakano Okami, at Shino Okami—na sama-samang tinatawag na Inari Okami. Ang mga gable sa harap ay Karaha-fu, isang uri ng cusped gable, at ang bawat beam ay may ukit ng magagandang bulaklak at puting fox.
Romon
Ang dalawang-palapag na Romon gate ang pangunahing pasukan ng Fushimi Inari Taisha at isa ring mahalagang kultural na ari-arian. Bagamat may ebidensya na naitayo na ito noon pang 1500, ang kasalukuyang dalawang-palapag na gate na may hip-and-gable roof at cypress bark thatching ay ipinagawa ni Toyotomi Hideyoshi bilang pasasalamat sa paggaling ng kanyang ina, si Oomandokoro, matapos niyang taimtim na manalangin para sa kanya. Naiwan pa sa dambana ang kanyang panalangin: “Kung maaari, pahabain pa ninyo ang buhay ng aking ina ng tatlong taon. Kung hindi kaya, kahit dalawang taon. At kung hindi pa rin iyon maisakatuparan, kahit tatlumpung araw man lang. Kapag ito’y natupad, mag-aalay ako ng sampung libong *koku.”
Sa magkabilang panig ng Romon gate ay matatagpuan ang mga rebulto ng “Zuijin,” ang mga diyos na nagsisilbing tagapagbantay ni Inari Okami. Sa lahat ng Romon gate sa mga shrine sa Kyoto, ito ang pinakamatanda at pinakamalaki.
*Ang 1 koku, humigit-kumulang 150 kilo ng bigas, ay pamantayan noong feudal Japan na katumbas ng konsumo ng isang tao sa loob ng isang taon. Ang sampung libong koku ay napakalaking yaman.
Gehaiden
Pagdaan sa Romon gate, makikita agad ang Gehaiden, isang gusali na may hip-and-gable roof at cypress bark thatching. Itinalaga rin ito bilang isang mahalagang pambansang kultural na ari-arian. Kilala ang gusali sa mga haligi nitong kulay vermillion at puting pader, na nagbibigay ng sagradong damdamin.
Dito isinasagawa ang mga ritwal, pagdiriwang, at iba’t ibang seremonya. Makikita rin sa loob ang mga alay mula sa iba’t ibang panig ng bansa.
